ಬೇಸಿಗೆಯಲ್ಲಿ ವಾತಾವರಣ ಬಿಸಿಯಾದಂತೆ ದೇಹದಲ್ಲಿಯೂ ಹಲವು ರೀತಿಯ ಬದಲಾವಣೆಗಳಾಗುತ್ತವೆ. ಅವುಗಳಲ್ಲಿ ಒಂದು ಹೀಟ್ ಸ್ಟ್ರೋಕ್. ಹೀಟ್ ಸ್ಟ್ರೋಕ್‍ನ ಅಪಾಯವನ್ನು ಕಡಿಮೆ ಮಾಡಲು ಈ ಮನೆಮದ್ದುಗಳು ನಿಮಗೆ ಸಹಕಾರಿಯಾಗಲಿವೆ. ಬೇಸಿಗೆ ಎಂದರೆ ಮೂಗು ಮುರಿಯುವವರೇ ಹೆಚ್ಚು. ಸೆಕೆ, ಬೆವರು, ದೇಹಕ್ಕೆ ಒಂದು ರೀತಿಯ ಅಹಿತಕರ ಅನುಭವವನ್ನು ನೀಡುತ್ತದೆ. ಬಿಸಿಲಿನ ಶಾಖಕ್ಕೆ ದೇಹದಿಂದ ಬರುವ ಬೆವರು ದುರ್ವಾಸನೆಯನ್ನು ಉಂಟುಮಾಡಿ ಇನ್ನಷ್ಟು ಕಿರಿಕಿರಿಯಾಗುವಂತೆ ಮಾಡುತ್ತದೆ.
ಭಾರತದಲ್ಲಿ ಹವಾಮಾನ ಬದಲಾವಣೆಯಾಗಿದೆ. ಬಿಸಿ ಗಾಳಿ ಹೆಚ್ಚುತ್ತಿದೆ. ಈ ಕುರಿತು ಹವಾಮಾನ ಇಲಾಖೆ ಕೂಡ ಮುನ್ನಚ್ಚರಿಕೆ ನೀಡಿದೆ. ಹೀಗಾಗಿ ಆರೋಗ್ಯವನ್ನು ಕಾಪಾಡಿಕೊಳ್ಳುವುದು ಅಗತ್ಯವಾಗಿದೆ. ವಾಂತಿ, ಸುಸ್ತು, ನಿರ್ಜಲೀಕರಣದ ಜೊತೆಗೆ ಹೀಟ್ ಸ್ಟ್ರೋಕ್‍ನಂತಹ ಅನಾರೋಗ್ಯ ಕಾಣಿಸಿಕೊಳ್ಳುತ್ತದೆ. ದೇಹದ ಉಷ್ಣಾಂಶ ಅತಿಯಾಗಿ, ನಿಯಂತ್ರಣಕ್ಕೆ ಸಿಗದಂತಾಗುತ್ತದೆ. 10 ರಿಂದ 15 ನಿಮಿಷಗಳಲ್ಲಿ ದೇಹದ ಉಷ್ಣತೆ 105 ಡಿಗ್ರಿ ಸೆಲ್ಸಿಯಸ್‍ವರೆಗೆ ಹೋಗುತ್ತದೆ. ಇಂತಹ ಸ್ಥಿತಿಯನ್ನು ಹೀಟ್ ಸ್ಟ್ರೋಕ್ ಎಂದು ಕರೆಯುತ್ತಾರೆ.
ಬೇಸಿಗೆಯಲ್ಲಿ ಕಾಣಿಸಿಕೊಳ್ಳುವ ಅಪಾಯಕಾರಿ ಅನಾರೋಗ್ಯಗಳ ಪೈಕಿ ಹೀಟ್ ಸ್ಟ್ರೋಕ್ ಕೂಡ ಒಂದು. ಹೀಟ್ ಸ್ಟ್ರೋಕ್‍ನ್ನು ಆರಂಭದಲ್ಲಿಯೇ ಗುರುತಿಸಿ ಚಿಕಿತ್ಸೆ ಪಡೆದುಕೊಂಡರೆ, ನಿಯಂತ್ರಿಸಬಹುದು. ಇಲ್ಲವಾದರೆ ಜೀವಕ್ಕೇ ಕುತ್ತು ತರುವ ಸಾಧ್ಯತೆಗಳಿರುತ್ತದೆ.
ಹೀಟ್ ಸ್ಟ್ರೋಕ್‍ಗೆ ಕಾರಣಗಳೇನು?
ದೇಹ ಅತಿಯಾಗಿ ನಿರ್ಜಲೀಕರಣಗೊಂಡಾಗ ಹೀಟ್ ಸ್ಟ್ರೋಕ್ ಉಂಟಾಗುತ್ತದೆ. ಹೆಚ್ಚು ಮಸಾಲೆಯುಕ್ತ ಆಹಾರ ಸೇವನೆ, ಮದ್ಯಪಾನ, ದ್ರವ ಆಹಾರಗಳ ಕೊರತೆ, ಹೆಚ್ಚು ದಪ್ಪನೆಯ ಬಟ್ಟೆ ಧರಿಸುವುದರಿಂದ ದೇಹಕ್ಕೆ ಅಗತ್ಯವಿರುವಷ್ಟು ಗಾಳಿಯೂ ಸಿಗುವುದಿಲ್ಲ. ಇದರಿಂದ ಇನ್ನಷ್ಟು ಉಷ್ಣತೆ ಜಾಸ್ತಿಯಾಗುತ್ತದೆ. ಈ ಎಲ್ಲ ಕಾರಣಗಳಿಂದ ಹೀಟ್ ಸ್ಟ್ರೋಕ್ ಉಂಟಾಗುತ್ತದೆ.
ಲಕ್ಷಣಗಳೇನು?
1) ದೇಹದ ಉಷ್ಣತೆ ಒಂದೇ ಸಮನೆ ಹೆಚ್ಚಳಗೊಳ್ಳುತ್ತದೆ
2) ಮಾತಿನಲ್ಲಿ ತೊದಲುವಿಕೆ
3) ಕೆಂಪು ಬಣ್ಣಕ್ಕೆ ಚರ್ಮ ತಿರುಗುವುದು
4) ವಾಂತಿ, ತಲೆಸುತ್ತುವಿಕೆ
5) ತಲೆನೋವು ಮತ್ತು ಹೃದಯ ಬಡಿತ ಹೆಚ್ಚಳ
6) ಹೀಟ್ ಸ್ಟ್ರೋಕ್ ಅನ್ನು ಮನೆಯಲ್ಲಿಯೇ ಕೆಲವು ಕ್ರಮಗಳನ್ನು ಅನುಸರಿಸಿಕೊಂಡು ನಿಯಂತ್ರಣದಲ್ಲಿಟ್ಟುಕೊಳ್ಳಬಹುದು. ಮನೆಯಿಂದ ಹೆಚ್ಚು ಹೊರಗಡೆ ಓಡಾಡುವವರು ಅವಶ್ಯವಾಗಿ ದೇಹವನ್ನು ತಂಪಾಗಿರಿಸಿಕೊಳ್ಳುವ ಮನೆಮದ್ದುಗಳನ್ನು ರೂಢಿಯಲ್ಲಿ ಟ್ಟುಕೊಳ್ಳಬೇಕು. ಆಗ ಹೀಟ್ ಸ್ಟ್ರೋಕ್‍ನಂತಹ ಅಪಾಯಕಾರಿ ಸಮಸ್ಯೆಯಿಂದ ದೂರವಿರಬಹುದು. ಹೀಟ್ ಸ್ಟ್ರೋಕ್ ನಿಂದ ದೂರವಿರಲು ಈ ಮನೆಮದ್ದುಗಳನ್ನು ಅಳವಡಿಸಿಕೊಳ್ಳಿ.
ಮಜ್ಜಿಗೆ ಬೇಸಿಗೆಯಲ್ಲಿ ದೇಹವನ್ನು ತಂಪಾಗಿಡಲು ಮಜ್ಜಿಗೆ ಹೆಚ್ಚು ಸಹಕಾರಿಯಾಗಿದೆ. ಪ್ರೋಬಯಾಟಿಕ್, ಪ್ರೋಟೀನ್ ಮತ್ತು ವಿಟಮಿನ್‍ಗಳನ್ನು ಯಥೇಚ್ಛವಾಗಿ ಹೊಂದಿರುವ ಮಜ್ಜಿಗೆ ದೇಹದ ಉಷ್ಣತೆಯನ್ನು ಸಮತೋಲನದಲ್ಲಿಡುತ್ತದೆ. ಬೇಸಿಗೆಯಲ್ಲಿ ಪ್ರತಿದಿನ ಕನಿಷ್ಟ 2 ಲೋಟವಾದರೂ ಮಜ್ಜಿಗೆಯನ್ನು ಸೇವಿಸಿ. ಮಜ್ಜಿಗೆಗೆ ಸ್ವಲ್ಪ ಉಪ್ಪು ಮತ್ತು ನೀರನ್ನು ಮಿಶ್ರಣ ಮಾಡಿ ಸೇವಿಸಿದರೆ ಉದರಕ್ಕೂ ಹಿತವಾಗುತ್ತದೆ.
ಹೆಸರುಕಾಳು
ಚೈನೀಸ್ ಔಷಧಗಳ ಪ್ರಕಾರ ಬೇಯಿಸಿದ ಹೆಸರುಕಾಳು ದೇಹವನ್ನು ತಂಪಾಗಿರಿಸಲು ಹೆಚ್ಚು ಸಹಕಾರಿಯಾಗಿದೆ. ದೇಹದ ಉಷ್ಣತೆಯನ್ನು ಹಿಡಿತದಲ್ಲಿಟ್ಟುಕೊಂಡು, ಹೀಟ್ ಸ್ಟ್ರೋಕ್ ಅಪಾಯವನ್ನು ಕಡಿಮೆ ಮಾಡುತ್ತದೆ, ಬೇಯಿಸಿದ ಹೆಸರುಕಾಳನ್ನು ರುಬ್ಬಿಕೊಂಡು ಬೆಲ್ಲ ಸೇರಿಸಿ ಕುಡಿದರೆ ಸಿಹಿಯೊಂದಿಗೆ ಆರೋಗ್ಯವೂ ಉತ್ತಮವಾಗುತ್ತದೆ.
ಈರುಳ್ಳಿ ಜ್ಯೂಸ್
ದೇಹದ ಉಷ್ಣತೆ ಕಡಿಮೆ ಮಾಡಲು ಈರುಳ್ಳಿ ಜ್ಯೂಸ್ ಉತ್ತಮ ಪದಾರ್ಥವಾಗಿದೆ. ದೇಹ ಹೀಟ್ ಆದಾಗ ಈರುಳ್ಳಿ ಜ್ಯೂಸ್ ಮಾಡಿ ಪಾದಕ್ಕೆ ಹಚ್ಚಿಕೊಳ್ಳಬೇಕು ಇದರಿಂದ ಇಡೀ ದೇಹ ತಂಪಾಗಿರುತ್ತದೆ. ಅಲ್ಲದೆ ಕಿವಿಯ ಹಿಂದೆ ಈರುಳ್ಳಿ ಜ್ಯೂಸ್ ಅನ್ನು ಹಚ್ಚಿಕೊಳ್ಳಿ. ಆದರೆ ಬಳಸುವ ಮುನ್ನ ಎಚ್ಚರ.ಈರುಳ್ಳಿಯ ಘಾಟು ಅಪಾಯ ತರದಂತೆ ನೋಡಿಕೊಳ್ಳಿ.
ಹುಣಸೆ ಹಣ್ಣಿನ ಜ್ಯೂಸ್
ಸಮೃದ್ಧವಾದ ವಿಟಮಿನ್, ಮಿನರಲ್ಸ್ ಗಳನ್ನು ಹೊಂದಿರುವ ಹುಣಸೆ ಹಣ್ಣು ದೇಹದ ತಾಪ ಕಡಿಮೆ ಮಾಡಲು ಸಹಾಯಕವಾಗಿದೆ. ಅನಾದಿ ಕಾಲದಿಂದಲೂ ಹುಣಸೆ ಹಣ್ಣನ್ನು ಔಷಧೀಯ ಪದಾರ್ಥವಾಗಿ ಬಳಸಲಾಗುತ್ತಿದೆ. ದೇಹದ ಉಷ್ಣತೆ ಕಡಿಮೆ ಮಾಡಲು ಮಾತ್ರವಲ್ಲ ಪಿತ್ತದಿಂದ ಮುಕ್ತಿ ಪಡೆಯಲೂ ಕೂಡ ಹುಣಸೆ ಹಣ್ಣನ್ನು ಬಳಸಲಾಗುತ್ತದೆ. ಹುಣಸೆಹಣ್ಣಿಗೆ ಸ್ವಲ್ಪ ನೀರು ಸೇರಿಸಿ, ಬೆಲ್ಲ ಅಥವಾ ಜೇನುತುಪ್ಪ ಸೇರಿಸಿ ದಿನಕ್ಕೊಂದು ಬಾರಿ ಸೇವಿಸಿ.
ಮಾವಿನ ಕಾಯಿ ಜ್ಯೂಸ್
ಹೀಟ್ ಸ್ಟ್ರೋಕ್ ನಿಯಂತ್ರಣಕ್ಕೆ ಮಾವು ಅತ್ಯುತ್ತಮ ಆಹಾರವಾಗಿದೆ. ಮಾವಿನ ಕಾಯಿಯನ್ನು ಚೆನ್ನಾಗಿ ಬೇಯಿಸಿ ಅದಕ್ಕೆ ಚಿಟಿಕೆ ಉಪ್ಪು, ಜೀರಿಗೆ, ಸಕ್ಕರೆ ಸೇರಿಸಿ ಮಿಕ್ಸಿ ಮಾಡಿ. ನಂತರ ಅದಕ್ಕೆ ನೀರು ಸೇರಿಸಿ ಜ್ಯೂಸ್‍ನಂತೆ ಮಾಡಿಕೊಂಡು ಸೇವಿಸಿ. ನೆನಪಿಡಿ, ಬೇಸಿಗೆಯಲ್ಲಿ ಮಾವಿನ ಕಾಯಿಯ ಅತಿಯಾದ ಬಳಕೆ ಒಳಿತಲ್ಲ. ಇದು ಪಿತ್ತ ಹೆಚ್ಚಾಗಲು ಕಾರಣವಾಗಬಹುದು.
