ವಿಶಾಖಪಟ್ಟಣಂ: ಆಂಧ್ರಪ್ರದೇಶದ ಆಡಳಿತಾರೂಢ ಯುವಜನ ಶ್ರಮಿಕ ರೈತು ಕಾಂಗ್ರೆಸ್ ಪಕ್ಷದ (ವೈಎಸ್‌ಆರ್‌ಸಿ) ನಾಯಕಿ, ನಟಿ ಆರ್‌ಕೆ ರೋಜಾ ಅವರ ಕಾರಿನ ಮೇಲೆ ನಟ ಹಾಗೂ ರಾಜಕಾರಣಿ ಪವನ್ ಕಲ್ಯಾಣ್ ಅವರ ಅಭಿಮಾನಿಗಳು ಶನಿವಾರ ದಾಳಿ ನಡೆಸಿದ್ದಾರೆ. ವಿಶಾಖಪಟ್ಟಣಂನ ವಿಮಾನ ನಿಲ್ದಾಣದ ಹೊರಗೆ ಈ ದಾಳಿ ನಡೆದಿದೆ. ವೈಎಸ್‌ಆರ್‌ಸಿಪಿಯ ಇತರೆ ನಾಯಕರಾದ ಜೋಗಿ ರಮೇಶ್ ಮತ್ತು ಟಿಟಿಡಿ ಅಧ್ಯಕ್ಷ ವೈವಿ ಸುಬ್ಬಾ ರೆಡ್ಡಿ ಅವರ ಮೇಲೆಯೂ ದಾಳಿ ನಡೆದಿದೆ ಎನ್ನಲಾಗಿದೆ.
ಆಂಧ್ರಪ್ರದೇಶ ಪ್ರವಾಸೋದ್ಯಮ, ಸಂಸ್ಕೃತಿ ಮತ್ತು ಯುವಜನ ಅಭಿವೃದ್ಧಿ ಸಚಿವೆಯಾಗಿರುವ ರೋಜಾ ಅವರು, ಮುಖ್ಯಮಂತ್ರಿ ವೈಎಸ್ ಜಗನ್ ಮೋಹನ್ ರೆಡ್ಡಿ ಅವರು ಪ್ರಸ್ತಾಪಿಸಿರುವ ಮೂರು ರಾಜಧಾನಿಗಳ ಯೋಜನೆಗೆ ಬೆಂಬಲವಾಗಿ ನಡೆದ ಸಮಾವೇಶದಲ್ಲಿ ಭಾಗವಹಿಸಿ ವಿಶಾಖಪಟ್ಟಣಂಗೆ ಮರಳುತ್ತಿದ್ದರು. ಈ ದಾಳಿಯಲ್ಲಿ ರೋಜಾ ಅವರ ಕಾರು ಚಾಲಕನ ತಲೆಗೆ ಗಾಯವಾಗಿದೆ. ಅವರನ್ನು ಚಿಕಿತ್ಸೆಗೆಂದು ಆಸ್ಪತ್ರೆಗೆ ದಾಖಲಿಸಲಾಗಿದೆ. ದಾಳಿ ನಡೆಸಿದವರು ಯಾರು ಎಂದು ಪತ್ತೆ ಮಾಡಲು ಸಿಸಿಟಿವಿ ಕ್ಯಾಮೆರಾ ದೃಶ್ಯಗಳನ್ನು ಪರಿಶೀಲನೆ ಮಾಡುವುದಾಗಿ ಪೊಲೀಸರು ತಿಳಿಸಿದ್ದಾರೆ.
ತಮ್ಮ ನಾಯಕರನ್ನು ಸ್ವಾಗತಿಸಲು ಪವನ್ ಕಲ್ಯಾಣ್ ಅವರ ಬೆಂಬಲಿಗರು ಮತ್ತು ಜನ ಸೇನಾ ಕಾರ್ಯಕರ್ತರು ವಿಮಾಣ ನಿಲ್ದಾಣದಲ್ಲಿ ಸೇರಿದ್ದರು. ಪವನ್ ಕಲ್ಯಾಣ್ ಅವರ ವಿರುದ್ಧ ರಾಜ್ಯದ ಸಚಿವರು ಮತ್ತು ವೈಎಸ್‌ಆರ್‌ಸಿಪಿ ನಾಯಕರು ಮಾಡುತ್ತಿದ್ದ ವಾಗ್ದಾಳಿಗಳಿಂದ ಅವರು ಕುಪಿತಗೊಂಡಿದ್ದರು ಎನ್ನಲಾಗಿದೆ. ಈ ವೇಳೆ ರೋಜಾ ಮತ್ತು ಇತರೆ ವೈಎಸ್‌ಆರ್‌ಸಿಪಿ ನಾಯಕರನ್ನು ಕಂಡು ಅವರ ಮೇಲೆ ದಾಳಿ ನಡೆಸಿದ್ದಾರೆ ಎಂದು ಆರೋಪಿಸಲಾಗಿದೆ.
ವಿಶಾಖಪಟ್ಟಣವನ್ನು ಆಂಧ್ರಪ್ರದೇಶದ ಕಾರ್ಯಕಾರಿ ರಾಜಧಾನಿಯಾಗಿ ಮಾಡುವುದರ ಪರವಾಗಿ ವಿಜಾಗ್‌ನಲ್ಲಿ ಶನಿವಾರ ಸಾವಿರಾರು ಮಂದಿ ಸೇರುವ ಮೂಲಕ ಬಲ ಪ್ರದರ್ಶನ ಮಾಡಿದ್ದರು. ಭಾರಿ ಮಳೆಯ ನಡುವೆಯೂ, ಸಮಾವೇಶದ ಆಯೋಜಕರಾದ ಉತ್ತರಾಂದ್ರ ಜಂಟಿ ಕಾರ್ಯ ಸಮಿತಿ (ಜೆಎಸಿ) ಬೃಹತ್ ಪ್ರಮಾಣದಲ್ಲಿ ಜನರ ಗುಂಪುಗಳನ್ನು ಸೇರಿಸುವಲ್ಲಿ ಯಶಸ್ವಿಯಾಗಿತ್ತು. ರಾಜಕೀಯವು ಒಳ್ಳೆಯ ಪರಿಸರದಲ್ಲಿ ನಡೆಯಬೇಕು. ಜನ ಸೇನಾ ನಾಯಕರು ತಮ್ಮ ಹೇಳಿಕೆಗಳೊಂದಿಗೆ ಸಾರ್ವಜನಿಕರ ಬಳಿ ಹೋಗಬೇಕು. ಜನರು ಅವರ ಹೇಳಿಕೆಗಳನ್ನು ಒಪ್ಪಿಕೊಂಡರೆ ನಾವು ಅದನ್ನು ಸ್ವಾಗತಿಸಲು ಸಿದ್ಧರಾಗಿದ್ದೇವೆ. ಪವನ್ ಕಲ್ಯಾಣ್ ಅವರಿಗೆ ಬಿಡುವಿನ ಸಮಯವಿದ್ದರೆ ಸಿನಿಮಾ ಮಾಡಲಿ. ಆದರೆ ಜನರ ನಡುವೆ ಸಂಘರ್ಷ ಉಂಟುಮಾಡಬಾರದು” ಎಂದು ರೋಜಾ ಹೇಳಿದ್ದಾರೆ.
