ಮುಂಬಯಿ: ಕೇಂದ್ರ ಸಚಿವ ನಾರಾಯಣ ರಾಣೆ ಅವರಿಗೆ ಬಾಂಬೆ ಹೈಕೋರ್ಟ್‌ನಲ್ಲಿ ಭಾರಿ ಹಿನ್ನಡೆಯಾಗಿದೆ. ಮಹಾರಾಷ್ಟ್ರದ ಮುಂಬಯಿಯ ಜುಹು ಪ್ರದೇಶದಲ್ಲಿನ ನಾರಾಯಣ ರಾಣೆ ಅವರಿಗೆ ಸೇರಿದ ಎಂಟು ಮಹಡಿಗಳ ಕಟ್ಟಡದಲ್ಲಿನ ಅನಧಿಕೃತ ಭಾಗವನ್ನು ತೆರವುಗೊಳಿಸುವಂತೆ ಮುಂಬಯಿ ಪಾಲಿಕೆ ಸಂಸ್ಥೆಗೆ ಬಾಂಬೆ ಹೈಕೋರ್ಟ್ ಮಂಗಳವಾರ ನಿರ್ದೇಶನ ನೀಡಿದೆ. ರಾಣೆ ಅವರ ಕಟ್ಟಡವು ಫ್ಲೋರ್ ಸ್ಪೇಸ್ ಇಂಡೆಕ್ಸ್ ಎಫ್‌ಎಸ್ಐ ಮತ್ತು ಕರಾವಳಿ ನಿರ್ಬಂಧ ವಲಯ ಸಿಆರ್‌ಜೆಡ್ ನಿಯಮಗಳನ್ನು ಉಲ್ಲಂಘಿಸಿದೆ ಎನ್ನುವುದನ್ನು ಹೈಕೋರ್ಟ್ ಪರಿಗಣಿಸಿದೆ.
ರಾಣೆ ಕುಟುಂಬ ನಡೆಸುತ್ತಿರುವ ಕಂಪೆನಿ ಸಲ್ಲಿಸಿರುವ ಎರಡನೇ ಅರ್ಜಿಯನ್ನು ಬೃಹನ್ ಮುಂಬಯಿ ಮಹಾನಗರ ಪಾಲಿಕೆಯು ಬಿಎಂಸಿ ಪರಿಗಣಿಸುವ ಅಥವಾ ಅನುಮತಿಸುವ ಹಾಗೆ ಇಲ್ಲ ಎಂದು ನ್ಯಾಯಮೂರ್ತಿಗಳಾದ ಆರ್‌ಡಿ ಧನುಕಾ ಮತ್ತು ಕಮಲ್ ಖಾತಾ ಅವರ ವಿಭಾಗೀಯ ಪೀಠ ಹೇಳಿದೆ. ರಾಣೆ ಕುಟುಂಬವು ತಮ್ಮ ಅಕ್ರಮ ಕಟ್ಟಡವನ್ನು ಸಕ್ರಮಗೊಳಿಸಿಕೊಡುವಂತೆ ಮನವಿ ಮಾಡಿತ್ತು. ಇದು ಉಳಿದ ಎಲ್ಲ ಅನಧಿಕೃತ ಕಟ್ಟಡ ನಿರ್ಮಾಣಗಳಿಗೂ ಉತ್ತೇಜನ ನೀಡುತ್ತದೆ ಎಂದು ಕೋರ್ಟ್ ಅಭಿಪ್ರಾಯಪಟ್ಟಿದೆ.
ಅನಧಿಕೃತ ಕಟ್ಟಡದ ಭಾಗಗಳನ್ನು ಎರಡು ವಾರಗಳ ಒಳಗೆ ಕೆಡವಬೇಕು ಮತ್ತು ಅದರ ಬಳಿಕ ಒಂದು ವಾರದಲ್ಲಿ ಕೋರ್ಟ್‌ಗೆ ಅನುಸರಣಾ ವರದಿ ಸಲ್ಲಿಸಬೇಕು ಎಂದು ಬಿಎಂಸಿಗೆ ಕೋರ್ಟ್ ನಿರ್ದೇಶಿಸಿದೆ. ಇದೇ ವೇಳೆ ನ್ಯಾಯಪೀಠವು ರಾಣೆ ಅವರಿಗೆ 10 ಲಕ್ಷ ರೂ ದಂಡ ವಿಧಿಸಿದ್ದು, ಎರಡು ವಾರಗಳ ಒಳಗೆ ಈ ಮೊತ್ತವನ್ನು ಮಹಾರಾಷ್ಟ್ರ ರಾಜ್ಯ ಕಾನೂನು ಸೇವೆಗಳ ಪ್ರಾಧಿಕಾರದಲ್ಲಿ ಜಮೆ ಮಾಡುವಂತೆ ಸೂಚಿಸಿದೆ.
ತನ್ನ ಆದೇಶಕ್ಕೆ ಆರು ವಾರಗಳ ಕಾಲ ತಡೆ ನೀಡಬೇಕು. ಇದರಿಂದ ಸುಪ್ರೀಂಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಸಲು ಅವಕಾಶ ಸಿಗಲಿದೆ ಎಂದು ನಾರಾಯಣ ರಾಣೆ ಅವರ ಪರ ವಕೀಲ ಶಾರ್ದೂಲ್ ಸಿಂಗ್ ಮನವಿ ಮಾಡಿದರು. ಆದರೆ ಅದಕ್ಕೆ ನ್ಯಾಯಪೀಠ ನಿರಾಕರಿಸಿತು. ಈ ಮುಂಚೆ ಪಾಲಿಕೆ ಹೊರಡಿಸಿದ್ದ ಆದೇಶಗಳಿಂದ ಪ್ರಭಾವಿತಗೊಳ್ಳದ ತಮ್ಮ ಎರಡನೇ ಅರ್ಜಿಯನ್ನು ನಿರ್ಧರಿಸುವಂತೆ ಬಿಎಂಸಿಗೆ ನಿರ್ದೇಶಿಸಬೇಕು ಎಂದು ಕೋರಿ ರಾಣೆ ಕುಟುಂಬದ ಮಾಲೀಕತ್ವದ ಕಾಲ್ಕಾ ರಿಯಲ್ ಎಸ್ಟೇಟ್ ಸಲ್ಲಿಸಿದ್ದ ಅರ್ಜಿಯನ್ನು ಕೋರ್ಟ್ ತಿರಸ್ಕರಿಸಿದೆ.
ಅಕ್ರಮ ಕಟ್ಟಡದ ಸಕ್ರಮ ಮನವಿಯನ್ನು ಬಿಎಂಸಿ ಜೂನ್‌ನಲ್ಲಿ ತಿರಸ್ಕರಿಸಿತ್ತು. ಕಟ್ಟಡ ನಿರ್ಮಾಣದಲ್ಲಿ ನಿಯಮ ಉಲ್ಲಂಘನೆ ನಡೆದಿದೆ ಎಂದು ಅದು ಹೇಳಿತ್ತು. ಇದರ ಬಳಿಕ ಜುಲೈನಲ್ಲಿ ಕಂಪೆನಿ ಮತ್ತೊಂದು ಅರ್ಜಿ ಸಲ್ಲಿಸಿತ್ತು. ಈ ಹಿಂದೆ ಕೇಳಿದ್ದಕ್ಕೆ ಹೋಲಿಸಿದರೆ ಕಡಿಮೆ ಭಾಗವನ್ನು ಸಕ್ರಮಗೊಳಿಸುವಂತೆ, ಅಭಿವೃದ್ಧಿ ನಿಯಂತ್ರಣ ಮತ್ತು ಪ್ರಚಾರ ನಿರ್ಬಂಧ 2034ರ ಹೊಸ ನಿಯಮಗಳ ಅಡಿ ಮನವಿ ಮಾಡಿತ್ತು. ಮುಂದಿನ ಆದೇಶದವರೆಗೂ ರಾಣೆ ಅವರ ಬಂಗಲೆ ವಿರುದ್ಧ ಯಾವುದೇ ಕ್ರಮ ತೆಗೆದುಕೊಳ್ಳಬಾರದು ಎಂದು ಬಿಎಂಸಿಗೆ ಆಗ ಕೋರ್ಟ್ ನಿರ್ದೇಶನ ನೀಡಿತ್ತು. ಹಾಗೆಯೇ ನಿರ್ಮಾಣ ಕಾರ್ಯ ಮುಂದುವರಿಸದಂತೆ ರಾಣೆ ಅವರಿಗೆ ಸೂಚಿಸಿತ್ತು.
