ಹುಬ್ಬಳ್ಳಿ: ಎರಡು ಮೂರು ವರ್ಷಗಳ ಕಾಲ ಜನರನ್ನು ಬೆನ್ನು ಬಿಡದೇ ಕಾಡಿದ್ದ ಕೊರೋನಾಗಿಂತ ದೊಡ್ಡ ಮಹಾಮಾರಿ ಅವಳಿನಗರದ ಜನರನ್ನು ಕಾಡುತ್ತಿದೆ. ಈ ಬಹುದೊಡ್ಡ ಸಮಸ್ಯೆಯಿಂದ ಜನರು ದೂರವಾಗಲು ಕೂಡ ಸಾಧ್ಯವಾಗುತ್ತಿಲ್ಲ. ಏಕೆಂದರೆ, ಕೋವಿಡ್‌ಗಿಂತ ಹುಬ್ಬಳ್ಳಿ ಜನರಿಗೆ ಧೂಳಿನದ್ದೇ ಭಯ. ಮಳೆ ಮುಗಿಯುತ್ತಿದ್ದಂತೆ ರಸ್ತೆಗಳ ನಿಜ ಸ್ವರೂಪ ಬಯಲಾಗಿದೆ. ರಸ್ತೆಗಿಳಿದರೆ ಧೂಳಿನ ಮಜ್ಜನ. ಸ್ಮಾರ್ಟ್‌ಸಿಟಿ ಯೋಜನೆ ಅವಧಿಯೂ ಮುಗಿಯುತ್ತಾ ಬಂದರೂ ನಗರದಲ್ಲಿ ಮಾತ್ರ ರಸ್ತೆಗಳ ವ್ಯವಸ್ಥೆ ಸುಧಾರಿಸಿಲ್ಲ.
ಮಳೆ ಬಂದರೆ ಕೆಸರು ಗದ್ದೆಯಾಗಿ, ಬಿಸಿಲಾದರೆ ಧೂಳಿನಿಂದ ಕೂಡುವ ನಗರದ ರಸ್ತೆಗಳು ಜನರನ್ನು ಅನಾರೋಗ್ಯದ ಕೂಪಕ್ಕೆ ತಳ್ಳುತ್ತಿವೆ. ವಾಣಿಜ್ಯ ನಗರಿ ಎಂದು ಕರೆಸಿ ಕೊಳ್ಳುವ ಹುಬ್ಬಳ್ಳಿಯ ಪ್ರಮುಖ ರಸ್ತೆಗಳನ್ನು ಹೊರತುಪಡಿಸಿದರೆ ಉಳಿದೆಲ್ಲ ರಸ್ತೆಗಳು ಬಹುತೇಕ ಧೂಳಿನಿಂದ ಕೂಡಿವೆ. ನಗರದಲ್ಲಿ ಬರೋಬ್ಬರಿ 2,100 ಚದರ ಕಿಲೋ ಮೀಟರ್ ರಸ್ತೆ ಇದೆ.ಇದರಲ್ಲಿ ಸ್ಮಾರ್ಟ್‌ಸಿಟಿ ಅಡಿ ಒಂದಿಷ್ಟು ಸಿಸಿ ರಸ್ತೆ ನಿರ್ಮಿಸಲಾಗಿದೆ. ಆದರೆ, ಉಳಿದ ರಸ್ತೆ ಗಳನ್ನು ವಿವಿಧ ಕಾಮಗಾರಿಗಳಿಗೆ ಅಗೆದು ಹಾಗೇ ಬಿಡಲಾಗಿದೆ.
ಆ ರಸ್ತೆಯಲ್ಲಿ ವಾಹನಗಳು ಸಂಚರಿಸಿದರೆ ಧೂಳು ಗಾಳಿಯಲ್ಲಿ ಬೆರತು ಜನರ ದೇಹ ಸೇರುತ್ತಿದೆ. ಮಾಸ್ಕ್ ಧರಿಸದೆ ಹೊರಬರುವಂತಿಲ್ಲ. ಕೋವಿಡ್ ರೂಪಾಂತರಿ ತಳಿ ಬಿಎಫ್ 7 ಸೋಂಕಿನ ಹಿನ್ನೆಲೆ ಸರ್ಕಾರ ಪ್ರತಿಯೊಬ್ಬರೂ ಮಾಸ್ಕ್ ಧರಿಸುವಂತೆ ಜನರಿಗೆ ಸೂಚಿಸಿದೆ. ಆದ್ರೆ, ನಗರದ ಹಳೇಹುಬ್ಬಳ್ಳಿ, ನೇಕಾರ ನಗರ, ಆನಂದ ನಗರ, ಕಾರವಾರ ರಸ್ತೆ ಸೇರಿ ಅನೇಕ ರಸ್ತೆಗಳು ಸಂಚರಿಸುವ ಜನರು ಮಾತ್ರ ಧೂಳಿನ ಭಯದಿಂದ ಮಾಸ್ಕ್ ಧರಿಸುವುದನ್ನು ರೂಢಿಸಿಕೊಂಡಿದ್ದಾರೆ.
ಇನ್ನೂ ಕೋವಿಡ್ ಭಯಕ್ಕಿಂತ ಈ ಧೂಳಿಗೆ ಇಲ್ಲಿನ ಜನತೆ ಭಯಭೀತರಾಗಿದ್ದಾರೆ. ಧೂಳಿನ ಕಣಗಳು ಗಾಳಿಯಲ್ಲಿ ಬೆರೆತು ಜನರ ದೇಹ ಸೇರುತ್ತಿವೆ. ಇದರಿಂದ ಕೆಮ್ಮು, ಅಲರ್ಜಿ, ಗಂಟಲು ಕೆರೆತದೊಂದಿಗೆ ಅಸ್ತಮಾ ಹಾಗೂ ಶ್ವಾಸಕೋಶಕ್ಕೆ ಕೊನೆ ಸಂಬಂಧಿಸಿದ ರೋಗಿಗಳಿದ ನರಳುವಂತಾಗಿದೆ. ವಾಹನ ಸವಾರರು ಸಹ ಧೂಳಿನಿಂದ ಹಲವು ಬಾರಿ ಅಪಘಾತಕ್ಕೆ ತುತ್ತಾಗಿದ್ದಾರೆ.ಒಂದು ವಾಹನ ಮುಂದೆ ಸಾಗಿದರೆ ಅದರ ಹಿಂದೆ ದಟ್ಟವಾದ ಧೂಳು ಆವರಿಸುತ್ತದೆ. ಕೊನೆಯ ಪಕ್ಷ ರಸ್ತೆಗೆ ನೀರನ್ನು ಸಿಂಪಡಿಸುವ ಮೂಲಕ ಧೂಳಿನ ನಿಯಂತ್ರಣಕ್ಕೆ ಕ್ರಮಕೈಗೊಳ್ಳಬೇಕು ಎನ್ನುತ್ತಿದ್ದಾರೆ ಸ್ಥಳೀಯರು.
ಒಟ್ಟಿನಲ್ಲಿ ಇಷ್ಟೆಲ್ಲಾ ಸಮಸ್ಯೆ ಇದ್ದರೂ ಸಂಬಂಧಿಸಿದ ಅಧಿಕಾರಿಗಳು ಮಾತ್ರ ಡೋಂಟ್‌ಕೇರ್ ಎಂದಿದ್ದಾರೆ. ಈಗಾಗಲೇ ಹುಬ್ಬಳ್ಳಿ-ಧಾರವಾಡದ ಅಭಿವೃದ್ಧಿ ಸ್ಮಾರ್ಟ್ ಸಿಟಿ ಹೆಸರಿನಲ್ಲಿ ಸಾವಿರಾರು ಕೋಟಿ ರೂಪಾಯಿ ಹಣವನ್ನ ಖರ್ಚು ಮಾಡಲಾಗಿದೆ. ಇಷ್ಟು ದೊಡ್ಡ ಮಟ್ಟದಲ್ಲಿ ಹಣವನ್ನು ರಸ್ತೆಗೆ ಸುರಿದರು ಧೂಳಿನಿಂದ ಮುಕ್ತಿ ಕಂಡುಕೊಳ್ಳಲು ಆಗಿಲ್ಲಾ. ಇನ್ನಾದರೂ ಸರ್ಕಾರ ಮತ್ತು ಸಂಬಂಧಿಸಿದ ಅಧಿಕಾರಿಗಳು ಎಚ್ಚೆತ್ತುಕೊಂಡು ಹುಬ್ಬಳ್ಳಿ-ಧಾರವಾಡದ ಜನರಿಗೆ ಧೂಳಿನಿಂದ ಮುಕ್ತಿ ಕೊಡಿಸಲು ಮನಸ್ಸು ಮಾಡಬೇಕಿದೆ.
