ಶಿವಮೊಗ್ಗ: ಪ್ರಮುಖ ರಾಜಕಾರಣಿಗಳೆಲ್ಲ ವಿಧಾನಸಭೆ ಚುನಾವಣೆಯ ಟಿಕೆಟ್‌ ಗಿಟ್ಟಿಸಿಕೊಳ್ಳುವ ಧಾವಂತದಲ್ಲಿದ್ದರೆ ಕಳೆದ 40 ವರ್ಷಗಳಿಂದ ರಾಜ್ಯ ಬಿಜೆಪಿಯ ಅವಿಭಾಜ್ಯ ಅಂಗವಾಗಿದ್ದ ಶಾಸಕ ಕೆ.ಎಸ್.ಈಶ್ವರಪ್ಪ ಅವರು ಚುನಾವಣೆ ರಾಜಕೀಯದಿಂದ ನಿವೃತ್ತಿ ಘೋಷಿಸಿ ಅಚ್ಚರಿ ಮೂಡಿಸಿದ್ದಾರೆ.
ಟಿಕೆಟ್‌ ಸಿಕ್ಕೇ ಸಿಗುತ್ತದೆ ಎಂಬ ಆತ್ಮವಿಶ್ವಾಸಲ್ಲಿದ್ದ ಅವರು ಅದು ಅನ್ಯರ ಪಾಲಾಗುತ್ತಿದೆ ಎಂಬುದು ಖಾತ್ರಿಯಾದಾಗ ಚುನಾವಣೆ ರಾಜಕೀಯದಿಂದಲೆ ನಿವೃತ್ತಿ ಘೋಷಿಸಿಕೊಂಡಿದ್ದಾರೆ. ಈಶ್ವರಪ್ಪ ಅವರ ಈ ನಿರ್ಧಾರ ಕೇವಲ ಬಿಜೆಪಿ ಅಲ್ಲದೆ ಎಲ್ಲ ಎಪಕ್ಷಗಳ ಮುಖಂಡರು ಮತ್ತು ಕಾರ್ಯಕರ್ತರಲ್ಲೂಅಚ್ಚರಿ ಮೂಡಿಸಿದೆ. ಅಲೆಮಾರಿ ಸಿದ್ದರಾಮಯ್ಯ ಪದಕ್ಕೆ ಸಿಡಿದ ‘ಕೈ’ ನಾಯಕರು, ಕೆ.ಎಸ್.ಈಶ್ವರಪ್ಪ ವಿರುದ್ಧ ವಾಗ್ದಾಳಿ
ಶಿವಮೊಗ್ಗದ ಅಡಕೆ ಮಂಡಿಯೊಂದರಲ್ಲಿ ಕೂಲಿ ಮಾಡುತ್ತಿದ್ದ ದಂಪತಿಯ ಮಗ ಈಶ್ವರಪ್ಪ ಮುಂದೊಂದು ದಿನ ರಾಜ್ಯ ರಾಜಕೀಯದಲ್ಲಿ ಉನ್ನತ ಸ್ಥಾನಕ್ಕೇರುತ್ತಾನೆ ಎಂದು ಯಾರೂ ಊಹಿಸಿರಲಿಲ್ಲ. ಜೀವನೋಪಾಯಕ್ಕಾಗಿ ಸೈಕಲ್‌ನಲ್ಲಿಅಗರಬತ್ತಿ ಮಾರುತ್ತಿದ್ದ ಅವರು ಸಂಘಟನಾತ್ಮಕ ಶಕ್ತಿ ಮೂಲಕ ಎತ್ತರೆತ್ತರಕ್ಕೆ ಏರುತ್ತಾ ಹೋದರು. ಇದು ಈಶ್ವರಪ್ಪರನ್ನು ದೊಡ್ಡದಾಗಿ ಬೆಳೆಸಿತು.
1970 ರ ದಶಕದಲ್ಲಿ ವಿದ್ಯಾರ್ಥಿ ದಿಸೆಯಲ್ಲೆ ಎಬಿವಿಪಿ ಕಾರ್ಯಕರ್ತನಾಗಿ ರಾಜಕೀಯ ಪ್ರವೇಶಿಸಿದ ಅವರು ಪಕ್ಷಕ್ಕೆ ನಿಷ್ಟರಾಗಿ ಅವಿರತ ದುಡಿದರು. ತುರ್ತುಪರಿಸ್ಥಿತಿಯಲ್ಲಿ ಕಾರಾಗೃಹ ವಾಸ ಸಹ ಅನುಭವಿಸಿದ್ದರು. ಬಿಜೆಪಿಗೆ ನಿಷ್ಠರಾಗಿ, ಪಕ್ಷದ ಬೆಳವಣಿಗೆಗಾಗಿ ದುಡಿದರು. ಅಂತಹವರು ವಿಧಾನಸಭೆ ಚುನಾವಣೆ ಮತದಾನಕ್ಕೆ ಇನ್ನೊಂದು ತಿಂಗಳು ಬಾಕಿ ಇರುವಾಗ ನಿವೃತ್ತಿ ಘೋಷಿಸಿದ್ದು ತೀವ್ರ ಚರ್ಚೆಗೀಡು ಮಾಡಿದೆ.
1989 ರ ವಿಧಾನಸಭೆ ಚುನಾವಣೆಯಲ್ಲಿ ಶಿವಮೊಗ್ಗ ಕ್ಷೇತ್ರದಲ್ಲಿ ಹಾಲಿ ಸಚಿವ ಕಾಂಗ್ರೆಸ್‌ನ ಪ್ರಭಾವಿ ನಾಯಕ ಕೆ.ಎಚ್‌.ಶ್ರೀನಿವಾಸ್‌ ಅವರ ವಿರುದ್ಧ ಯಾರನ್ನು ಕಣಕ್ಕಿಳಿಸಬೇಕೆಂಬ ಚರ್ಚೆ ನಡೆದಿತ್ತು. ಬೇರಾವುದೆ ಚುನಾವಣೆಗಳನ್ನು ಎದುರಿಸಿದ ಅನುಭವವಿಲ್ಲದ ಯುವಕ ಬಿಜೆಪಿ ನಗರಾಧ್ಯಕ್ಷ ಕೆ.ಎಸ್.ಈಶ್ವರಪ್ಪರನ್ನು ಕೇವಲ ಸ್ಪರ್ಧೆಗಾಗಿ ಎಂಬಂತೆ ಕಣಕ್ಕಿಳಿಸಲಾಗಿತ್ತು. ಶ್ರೀನಿವಾಸ್‌ ಸುಲಭವಾಗಿ 3 ನೇ ಬಾರಿ ಗೆಲ್ಲುತ್ತಾರೆ ಎಂಬ ಮಾತುಗಳು ಕೇಳಿಬಂದಿತ್ತು. ಆದರೆ, ಎಲ್ಲರ ನಿರೀಕ್ಷೆಗಳನ್ನು ಸುಳ್ಳು ಮಾಡಿದ ಈಶ್ವರಪ್ಪ 1,304 ಮತಗಳ ಅಂತರದಿಂದ ವಿಜಯಶಾಲಿಯಾಗಿ ಅಚ್ಚರಿ ಮೂಡಿಸಿದರು.
1989ರಿಂದ ನಿರಂತರವಾಗಿ ಬಿಜೆಪಿಯನ್ನು ಪ್ರತಿನಿಧಿಸುತ್ತಾ ಬಂದಿರುವ ಅವರು 7 ಚುನಾವಣೆಗಳಲ್ಲಿ 5 ಗೆಲುವು ಸಾಧಿಸಿ 2 ಸೋಲು ಕಂಡಿದ್ದಾರೆ. ಜೆಡಿಎಸ್‌-ಬಿಜೆಪಿ ಸಮ್ಮಿಶ್ರ ಸರಕಾರದಲ್ಲಿ ಜಲಸಂಪನ್ಮೂಲ, ಬಿಜೆಪಿ ಸರಕಾರದಲ್ಲಿ ಇಂಧನ, ಕಂದಾಯ, ಉಪ ಮುಖ್ಯಮಂತ್ರಿ, ಯುವಜನ ಸೇವೆ ಮತ್ತು ಕ್ರೀಡೆ, ಗ್ರಾಮೀಣಾಭಿವೃದ್ಧಿ ಸಚಿವರಾಗಿ ಸೇವೆ ಸಲ್ಲಿಸಿದರು. 2014-2018ರಲ್ಲಿ ವಿಧಾನ ಪರಿಷತ್‌ನಲ್ಲಿ ಪ್ರತಿಪಕ್ಷದ ನಾಯಕರೂ ಆಗಿದ್ದರು. 2000ರಲ್ಲಿ ಕೇಂದ್ರ ರೇಷ್ಮೆ ಮಂಡಳಿ ಅಧ್ಯಕ್ಷರಾಗಿಯೂ ಸೇವೆ ಸಲ್ಲಿಸಿದರು.
ಸಾಮಾನ್ಯ ಕಾರ್ಯಕರ್ತನಾಗಿ ಹಾಲಿ ಸಚಿವರಿಗೆ ಸೋಲುಣಿಸಿದ ಬಗ್ಗೆ ಅವರು ಹೆಮ್ಮೆಯಿಂದ ಹೇಳಿಕೊಳ್ಳುತ್ತಿದ್ದರು. ಆದರೆ, 2013ರಲ್ಲಿ ಹಾಲಿ ಉಪಮುಖ್ಯಮಂತ್ರಿಯಾಗಿ ಮಹಾನಗರ ಪಾಲಿಕೆ ಸದಸ್ಯ ಕೆ.ಬಿ.ಪ್ರಸನ್ನ ಕುಮಾರ್‌ ಎದುರು ಪರಾಜಯ ಕಂಡಿದ್ದಲ್ಲದೆ 3ನೇ ಸ್ಥಾನಕ್ಕೆ ಕುಸಿದು ತೀವ್ರ ಆಘಾತ ಅನುಭವಿಸಿದ್ದರು. 2002ರಲ್ಲಿ ಕನಕಪುರ ಲೋಕಸಭೆ ಉಪ ಚುನಾವಣೆಯಲ್ಲಿ ಮಾಜಿ ಪ್ರಧಾನಿ ಎಚ್‌.ಡಿ.ದೇವೇಗೌಡ ಎದುರು ಪರಾಭವಗೊಂಡಿದ್ದರು.
ನಿರಂತರ ಅಧಿಕಾರ
ಈಶ್ವರಪ್ಪ ಅವರು ಅಚಾನಕ್ಕಾಗಿ ಶಾಸಕರಾದರೂ 35 ವರ್ಷಗಳ ಕಾಲ ನಿರಂತರವಾಗಿ ಅಧಿಕಾರ ಅನುಭವಿಸಿದರು. 1999 ರಲ್ಲಿ ಸೋತಾಗ ಕೇಂದ್ರದ ಎನ್‌ಡಿಎ ಸರಕಾರವು ಇವರನ್ನು ಕೇಂದ್ರದ ರೇಷ್ಮೆ ಮಂಡಳಿ ಅಧ್ಯಕ್ಷರನ್ನಾಗಿ ಮಾಡಿತ್ತು. 2013ರ ಚುನಾವಣೆಯಲ್ಲಿ ಮತ್ತೊಮ್ಮೆ ಸೋತಾಗ ಪಕ್ಷವು ಇವರನ್ನು ಎಂಎಲ್‌ಸಿಯನ್ನಾಗಿ ಮಾಡಿ ಪ್ರತಿಪಕ್ಷದ ನಾಯಕನನ್ನಾಗಿಯೂ ನೇಮಕ ಮಾಡಿತು.
ಪಕ್ಷ ಸಂಘಟನೆ
1992ರಲ್ಲಿ ರಾಜ್ಯ ಬಿಜೆಪಿ ಅಧ್ಯಕ್ಷರಾದ ಈಶ್ವರಪ್ಪ ಅವರು ರಾಜ್ಯದೆಲ್ಲೆಡೆ ಸಂಚರಿಸಿ ಪಕ್ಷವನ್ನು ಸದೃಢಗೊಳಿಸಿದರು. ಇದರ ಪರಿಣಾಮ 1994ರ ವಿಧಾನಸಭೆ ಚುನಾವಣೆಯಲ್ಲಿಮೊದಲ ಬಾರಿಗೆ ಬಿಜೆಪಿಯು 40 ಸ್ಥಾನಗಳನ್ನು ಗಳಿಸಿತು. 2010ರಲ್ಲಿಇಂಧನ ಸಚಿವರಾಗಿದ್ದ ಇವರು ದಿಲ್ಲಿಮುಖಂಡರ ಸೂಚನೆ ಮೇರೆಗೆ ಸಚಿವ ಸ್ಥಾನಕ್ಕೆ ರಾಜೀನಾಮೆ ಸಲ್ಲಿಸಿ ಮತ್ತೊಮ್ಮೆ ಪಕ್ಷದ ಚುಕ್ಕಾಣಿ ಹಿಡಿದು ಸಂಘಟನೆ ಮಾಡಿದರು.
ನರ ನಾಡಿಗಳಲ್ಲೂ ಹಿಂದುತ್ವ:
ಆರ್‌ಎಸ್‌ಎಸ್‌ ಗರಡಿಯಲ್ಲಿ ಪಳಗಿದ ಕೆ.ಎಸ್.ಈಶ್ವರಪ್ಪ ಅವರ ನರ ನಾಡಿಗಳಲ್ಲೂ ಹಿಂದುತ್ವ ಮತ್ತು ಕೇಸರಿ ವಿಚಾರಧಾರೆಗಳನ್ನು ಮೈಗೂಡಿಸಿಕೊಂಡಿದ್ದಾರೆ. ಹಿಂದುತ್ವದ ವಿಷಯದಲ್ಲಿ ಪ್ರಖರವಾದ ಮಾತುಗಳ ಮೂಲಕ ಕಾರ್ಯಕರ್ತರನ್ನು ಬಡಿದೆಬ್ಬಿಸುವ ಕೆಲವನ್ನು ಮಾಡಿದ್ದಾರೆ. ಪ್ರಖರ ಭಾಷಣದ ಆವೇಶದಲ್ಲಿ ಇವರು ಬಳಸಿದ ಕಡಿ, ಕತ್ತರಿಸು ಪದಗಳು ರಾಜ್ಯ ರಾಜಕೀಯದಲ್ಲಿ ಬಾರಿ ವಿವಾದವನ್ನೇ ಸೃಷ್ಟಿಸಿದವು.
