ಹೊಸದಿಲ್ಲಿ: ಪಾಸ್‌ಪೋರ್ಟ್‌ಗಳಿಗೆ ಪೊಲೀಸರ ಸಮ್ಮತಿ ಪತ್ರ ಪಡೆಯುವ ಪ್ರಕ್ರಿಯೆಯನ್ನು ಸರಳೀಕರಣಗೊಳಿಸಿದೆ. ಅರ್ಜಿದಾರರು ಬುಧವಾರದಿಂದ ಜಾರಿಗೆ ಬಂದಿರುವಂತೆ, ಅಂಚೆ ಕಚೇರಿಯ ಪಾಸ್‌ಪೋರ್ಟ್‌ ಸೇವಾ ಕೇಂದ್ರಗಳ (ಪಿಒಪಿಎಸ್‌ಕೆ) ಮೂಲಕ ಪಾಸ್‌ಪೋರ್ಟ್‌ಗೆ ಪೊಲೀಸರ ಸಮ್ಮತಿ ಪತ್ರ ಕೋರಿ ಆನ್‌ಲೈನ್‌ ಮೂಲಕವೇ ಅರ್ಜಿ ಸಲ್ಲಿಸಬಹುದಾಗಿದೆ.
ಪಾಸ್‌ಪೋರ್ಟ್‌ಗೆ ಅರ್ಜಿ ಸಲ್ಲಿಸಿದವರ ಕ್ರಿಮಿನಲ್‌ ಹಿನ್ನೆಲೆಯನ್ನು ಪರಿಶೀಲಿಸುವುದು ಪಾಸ್‌ಪೋರ್ಟ್‌ ವಿತರಣಾ ಕೇಂದ್ರದ ಅಧಿಕಾರಿಗಳಿಗೆ ಕಡ್ಡಾಯವಾಗಿದೆ. ಅರ್ಜಿದಾರರಿಗೆ ಅವರ ನಿವಾಸದ ವಿಳಾಸದ ಪ್ರಕಾರ ಸ್ಥಳೀಯ ಪೊಲೀಸ್‌ ಠಾಣೆಗಳಿಂದ ಪೊಲೀಸ್‌ ಕ್ಲಿಯರೆನ್ಸ್‌ ಪ್ರಮಾಣಪತ್ರ (ಪಿಪಿಸಿ) ನೀಡಲಾಗುತ್ತದೆ. ಇದನ್ನು ಅಧಿಕಾರಿಗಳು ಪರಿಶೀಲಿಸುವುದು ಮೊದಲಿನಿಂದಲೂ ನಡೆದುಕೊಂಡು ಬಂದಿರುವ ಪದ್ಧತಿಯಾಗಿದೆ.
ಒಬ್ಬ ವ್ಯಕ್ತಿಯು ಉದ್ಯೋಗ, ದೀರ್ಘಾವಧಿ ವೀಸಾ ಅಥವಾ ವಿದೇಶಕ್ಕೆ ವಲಸೆ ಹೋಗಲು ಅರ್ಜಿ ಸಲ್ಲಿಸಿದ ಸಂದರ್ಭದಲ್ಲಿಈ ಪ್ರಮಾಣಪತ್ರದ ಅಗತ್ಯವಿರುತ್ತದೆ. ಈ ಹಿಂದೆ ವಿದೇಶದಲ್ಲಿ ನೆಲೆಸಿದವರು ಸರಕಾರದ ಪಾಸ್‌ಪೋರ್ಟ್‌ ಸೇವಾ ಪೋರ್ಟಲ್‌ ಮೂಲಕ ಅಥವಾ ಭಾರತೀಯ ರಾಯಭಾರ ಕಚೇರಿ/ಹೈಕಮಿಷನ್‌ ಕಚೇರಿಯಲ್ಲಿ ಆನ್‌ಲೈನ್‌ ಮೂಲಕ ಪೊಲೀಸರ ಸಮ್ಮತಿ ಪತ್ರ ಕೋರಿ ಅರ್ಜಿ ಸಲ್ಲಿಸಬಹುದಾಗಿತ್ತು.
ಈಗ, ಪಾಸ್‌ಪೋರ್ಟ್‌ ಸಂಬಂಧಿತ ಸೇವೆಗಳ ಪ್ರಕ್ರಿಯೆಯನ್ನು ಸರಳೀಕರಣಗೊಳಿಸುವ ನಿಟ್ಟಿನಲ್ಲಿ ಸರಕಾರವು ಎಲ್ಲಾ ಆನ್‌ಲೈನ್‌ ಅಂಚೆ ಕಚೇರಿಗಳ ಪಾಸ್‌ಪೋರ್ಟ್‌ ಸೇವಾ ಕೇಂದ್ರಗಳಲ್ಲಿ ಅರ್ಜಿಗಳನ್ನು ಪಡೆಯಲು ಅನುಮತಿಸಿದೆ. ಪಿಪಿಸಿಗಳಿಗೆ ಬೇಡಿಕೆಯಲ್ಲಿ ಭಾರಿ ಏರಿಕೆ ಕಂಡು ಬಂದಿರುವ ಹಿನ್ನೆಲೆಯಲ್ಲಿ ಕೇಂದ್ರ ವಿದೇಶಾಂಗ ಸಚಿವಾಲಯ ಈ ಕ್ರಮ ಕೈಗೊಂಡಿದೆ.
