ಬಳ್ಳಾರಿ: ಉದ್ಘಾಟನೆಯಾದ 5 ತಿಂಗಳಲ್ಲಿ ಸಾವಿರಾರು ರೋಗಿಗಳಿಗೆ ಗುಣಮಟ್ಟದ ಚಿಕಿತ್ಸೆ ನೀಡಿ ಗುಣಪಡಿಸಿದ ಇಲ್ಲಿನ ಸುವಿಶೇಷ ಅಪಘಾತ ಆಸ್ಪತ್ರೆ (ಟ್ರಾಮಾ ಕೇರ್‌ ಸೆಂಟರ್‌), ಸಾರ್ವಜನಿಕ ಆರೋಗ್ಯ ಕಾಪಾಡುವಲ್ಲಿ ಆಶಾಕಿರಣ ಎನಿಸಿದೆ.
ಸಾವಿರಕ್ಕಿಂತ ಹೆಚ್ಚು ಮೇಜರ್‌ ಅಪರೇಷನ್‌ ಹಾಗೂ ಇಪ್ಪತ್ತು ಸಾವಿರಕ್ಕೂ ಅಧಿಕ ಹೊರರೋಗಿಗಳು ಚಿಕಿತ್ಸೆ ಪಡೆದು ಗುಣಮುಖರಾಗಿದ್ದಾರೆ. ತೀವ್ರ ಅಪಘಾತದ ವೇಳೆ ಚಿಕಿತ್ಸೆಗಾಗಿ ಬೆಂಗಳೂರು ಸೇರಿ ನೆರೆಹೊರೆಯ ರಾಜ್ಯಗಳಿಗೆ ತೆರಳಬೇಕಿದ್ದ ಪರದಾಟ ಈ ಮೂಲಕ ತಪ್ಪಿದೆ. ಸುತ್ತಲಿನವರಿಗೂ ಆರೋಗ್ಯ ಅಭಯಈ ಆಸ್ಪತ್ರೆಯಲ್ಲಿ ಆರ್ಥೋಪೆಡಿಕ್‌, ನ್ಯೂರೊ ಹಾಗೂ ಪ್ಲಾಸ್ಟಿಕ್‌ ಸರ್ಜರಿ, ರೇಡಿಯೊಲಾಜಿ, ಎಕ್ಸ್‌ರೇ, ಸಿಟಿ ಸ್ಕಾತ್ರ್ಯನ್‌ ಹಾಗೂ ನಾನಾ ಚಿಕಿತ್ಸಾ ಸೌಲಭ್ಯಗಳಿವೆ. ಚಿಕಿತ್ಸೆ ಪಡೆಯಲು ರಾಯಚೂರು, ಕೊಪ್ಪಳ, ಯಾದಗಿರಿ, ಚಿತ್ರದುರ್ಗ ಸೇರಿ ನಾನಾ ಜಿಲ್ಲೆ ಹಾಗೂ ಆಂಧ್ರದ ಕರ್ನೂಲ್‌, ಆದೋನಿ, ಅನಂತಪುರ, ಗುತ್ತಿ ಭಾಗಗಳಿಂದ ಹಲವರು ಆಗಮಿಸಿ, ಚಿಕಿತ್ಸೆ ಪಡೆದು ಗುಣಮುಖರಾಗಿದ್ದಾರೆ. 25ಕ್ಕೂ ಹೆಚ್ಚು ರೋಗಿಗಳು ಮೊಣಕಾಲು ಸವೆತದ ಚಿಕಿತ್ಸೆ ಪಡೆದು ಸಾಮಾನ್ಯ ನಡಿಗೆಯಲ್ಲಿ ತೊಡಗಿದ್ದಾರೆ.
ಎಂಟು ಅತ್ಯಾಧುನಿಕ ಆಪರೇಷನ್‌ ಥಿಯೇಟರ್‌(ಒಟಿ), ಆರು ನೂತನ ತಂತ್ರಜ್ಞಾನ ಒಟಿಗಳು ಇಲ್ಲಿವೆ. ಇವರಿಗೆ ಉಚಿತ ಚಿಕಿತ್ಸೆ
ಆಯುಷ್ಮಾನ್‌ ಭಾರತ ಆರೋಗ್ಯ ಕರ್ನಾಟಕ (ಎಬಿಆರ್‌ಕೆ), ಎಸ್‌ಸಿ, ಎಸ್‌ಟಿ ಯೋಜನೆ ಹಾಗೂ ಬಿಪಿಎಲ್‌ ಕಾರ್ಡ್‌ ಹೊಂದಿದ ರಾಜ್ಯದ ಜನರಿಗೆ ಇಲ್ಲಿ ಉಚಿತ ಚಿಕಿತ್ಸೆ ನೀಡಲಾಗುತ್ತದೆ. ಅನ್ಯ ರಾಜ್ಯಗಳ ಜನರಿಗೆ ಸರಕಾರ ನಿಗದಿಪಡಿಸಿದ ಶುಲ್ಕ ಪಡೆದುಕೊಳ್ಳಲಾಗುತ್ತದೆ. ಖಾಸಗಿ ಆಸ್ಪತ್ರೆಗಳಲ್ಲಿ ಈ ಸೌಲಭ್ಯಗಳು ಲಭ್ಯವಿದ್ದರೂ ಲಕ್ಷಾಂತರ ರೂಪಾಯಿ ವ್ಯಯಿಸಬೇಕಾದ ಅನಿವಾರ್ಯತೆಯನ್ನು ಈ ಟ್ರಾಮಾ ಕೇರ್‌ ಸೆಂಟರ್‌ ತಪ್ಪಿಸಿದೆ. ಸೌಲಭ್ಯ ಕಲ್ಪಿಸುವ ಪಿಆರ್‌ಒ ಉಚಿತ ಚಿಕಿತ್ಸೆ ಸೌಲಭ್ಯ ಪಡೆಯ ಬಯಸುವ ರೋಗಿಗಳ ಪಡಿತರ ಚೀಟಿ ಹಾಗೂ ಎಬಿಆರ್‌ಕೆ ಕಾರ್ಡ್‌ನಲ್ಲಿ ಹೆಸರು, ಜನ್ಮ ದಿನಾಂಕ ಸೇರಿ ಎಲ್ಲ ಮಾಹಿತಿ ಸ್ಪಷ್ಟವಾಗಿರಬೇಕು.
ದಾಖಲೆಗಳಲ್ಲಿ ವ್ಯತ್ಯಾಸವಾದರೆ ಸರಕಾರ ನಿಗದಿಪಡಿಸಿದ ಶುಲ್ಕ ಪಾವತಿಸಬೇಕಾಗುತ್ತದೆ. ಯಾವೊಬ್ಬ ರೋಗಿ ಉಚಿತ ಚಿಕಿತ್ಸೆ ಸೌಲಭ್ಯದಿಂದ ವಂಚಿತರಾಗಬಾರದು ಎಂಬ ಸದಾಶಯದಿಂದ ಪಿಆರ್‌ಒ ನೇಮಕ ಮಾಡಲಾಗಿದೆ. ಸಂಬಂಧಪಟ್ಟ ದಾಖಲೆ ಸರಿಪಡಿಸಲು ನೇರವಾಗಿ ತಹಸೀಲ್ದಾರ್‌ರಿಗೆ ದೂರವಾಣಿ ಕರೆ ಮಾಡಲಾಗುತ್ತದೆ. ಆದರೆ, ಕೆಲವು ತಹಸೀಲ್ದಾರರು ಸಕಾಲಕ್ಕೆ ಮಾಹಿತಿ ನೀಡುತ್ತಿಲ್ಲ. ಸ್ಥಳೀಯ ರಾಜಕೀಯ ಮುಖಂಡರ ಮೂಲಕ ಅಧಿಕಾರಿಗಳ ಮೇಲೆ ಒತ್ತಡ ಹೇರಿ ಸರಿಪಡಿಸಲಾಗುತ್ತಿದೆ. ದಾಖಲೆ ಸರಿಪಡಿಸಲು ಅಧಿಕಾರಿಗಳು ಮೀನಮೇಷ ತೋರುತ್ತಿದ್ದಾರೆ ಎಂಬ ಆರೋಪವೂ ಕೇಳಿಬಂದಿದೆ.
ಜಿಲ್ಲೆಯ ಜನರ ಒತ್ತಾಸೆ ಟ್ರಾಮಾ ಕೇರ್‌ ಸೆಂಟರ್‌ಗೆ ಕೇಂದ್ರ ಹಾಗೂ ರಾಜ್ಯ ಸರಕಾರದ ಅನುದಾನದಿಂದ ಅತ್ಯಾಧುನಿಕ ಸೌಕರ್ಯಗಳನ್ನು ಒದಗಿಸಲಾಗಿದೆ. ಎಂಆರ್‌ಐ ಸ್ಕ್ಯಾನ್ ಅಗತ್ಯವಿದ್ದು, ಸರಕಾರಕ್ಕೆ ಮನವಿ ಸಲ್ಲಿಸಲಾಗಿದೆ. ವಿಮ್ಸ್‌ನಲ್ಲಿ ಈಗಾಗಲೇ ಈ ಸೌಲಭ್ಯವಿದೆ. ಆದರೆ, ಪ್ರತಿ ಸಾರಿ ರೋಗಿಗಳನ್ನು ಸ್ಥಳಾಂತರಿಸಲು ಪರದಾಡಬೇಕಾಗುತ್ತಿದೆ. ಹೀಗಾಗಿ ಸರಕಾರ ಸ್ಪಂದಿಸಿದರೆ ಅನುಕೂಲವಾಗಲಿದೆ ಎಂಬುದು ಜಿಲ್ಲೆಯ ಜನರ ಒತ್ತಾಸೆಯಾಗಿದೆ. ಟ್ರಾಮಾ ಕೇರ್‌ನಲ್ಲಿ ಇಲ್ಲಿಯವರೆಗೆ ಸಾವಿರಾರು ರೋಗಿಗಳು ಚಿಕಿತ್ಸೆ ಪಡೆದು ಗುಣಮುಖರಾಗಿದ್ದಾರೆ. ಹಿಂದೆ ಮೇಜರ್‌ ಆಪರೇಷನ್‌ ವೇಳೆ ನೆರೆಹೊರೆಯ ರಾಜ್ಯ ಹಾಗೂ ಬೆಂಗಳೂರಿಗೆ ಹೋಗುವುದು ತಪ್ಪಿದೆ. ಈ ಆಸ್ಪತ್ರೆಗೆ ಎಂಆರ್‌ಐ ಸ್ಕ್ಯಾನ್ ಅಗತ್ಯವಿದ್ದು, ಸರಕಾರ ಒದಗಿಸಿದರೆ ಜಿಲ್ಲೆಯ ಜನತೆ ಹಾಗೂ ಆಸ್ಪತ್ರೆಗೂ ಅನುಕೂಲವಾಗಲಿದೆ
